Ճողվածքների վիրահատությունը ցանցի կիրառմամբ․ ինչ պետք է իմանա պացիենտը

Նյութը պատրաստվել է Միքայելյան համալսարանական հիվանդանոցի ընդհանուր վիրաբույժ Անդրանիկ Ալեքսանյանի հետ համատեղ։

Ճողվածքը ախտաբանական վիճակ է, երբ որովայնի որևէ օրգան կամ ճարպային հյուսվածք դուրս է գալիս մկանային պատի թույլ կամ «թուլացած» հատվածներից։ Այն կարող է առաջանալ որովայնում, ցայլքի և փոշտի շրջաններում կամ վիրահատական սպիերի հատվածներում։ Ճողվածքն ինքնուրույն չի վերանում և հաճախ ժամանակի ընթացքում մեծանում է, առաջացնելով էսթետիկ խնդիրներ, ցավ, անհարմարություն և լրջագույն բարդություններ։

Բարեբախտաբար, ժամանակակից վիրաբուժությունը թույլ է տալիս արդյունավետ լուծել այս խնդիրը՝ ցանցի կիրառմամբ, որը նվազեցնում է ճողվածքի կրկնվելու ռիսկը և ապահովում ավելի արագ ապաքինում։

Ի՞նչ է ճողվածքի վիրահատությունը

Ճողվածքի վիրահատության հիմնական նպատակը որովայնի խոռոչից մկանային պատի թույլ հատվածներով դուրս եկած օրգանը կամ դրա հատվածը իր տեղը վերադարձնելն է և մկանային պատի ամրացումը՝ կրկնություններից խուսափելու համար։

Երկու հիմնական մեթոդներն են.

1. Ավանդական (առանց ցանցի) մեթոդ – մկաններն ու հյուսվածքները միացվում են կարերով՝ առանց լրացուցիչ նյութի։
   
2. Ցանցով մեթոդ (mesh repair) – սինթետիկ նյութից կամ կիսաշարակցական նյութերից պատրաստված ցանց է տեղադրվում թույլ հատվածի վրա, ինչը ամրացնում է պատը։

Ճողվածքային ցանցը վիրաբուժական իմպլանտ է, որն օգտագործվում է ճողվածքի վիրահատության ժամանակ թուլացած կամ վնասված հյուսվածքն ամրացնելու նպատակով: Այն ապահովում է լրացուցիչ ամրացում և նպաստում է հետվիրահատական արագ ապաքինմանը:

Ցուցումներ․ ե՞րբ է անհրաժեշտ վիրահատությունը

Ճողվածքի վիրահատությունը ցուցված է, երբ.

• Ճողվածքը ցավոտ է կամ մեծանում է ժամանակի ընթացքում
  
• Դառնում է անհարմար առօրյա գործունեության ժամանակ
  
• Կա ճողվածքի օղակման ռիսկ, որը կարող է կյանքին վտանգ սպառնացող բարդությունների պատճառ դառնալ
  
• Պացիենտը ցանկանում է ակտիվ կենսակերպի վերականգնում և էսթետիկ խնդիրների վերջնական լուծում
  

Հիշեք. Ճողվածքը չի վերանում առանց վիրահատության, իսկ սպասելու դեպքում այն կարող է բարդանալ։

Հակացուցումներ

Չնայած ցանցով վիրահատությունն առավել տարածված և արդյունավետ մեթոդ է, որոշ դեպքերում այն ժամանակավորապես հակացուցված է և հետաձգվում է մինչև ավելի անվտանգ ժամանակ։

• Սուր բորբոքային հիվանդություններ
  
• Ծանր սրտային, թոքային կամ երիկամային անբավարարություն, հատկապես սրացումների փուլում
  
• Հղիություն
  
• Ցանցի կառուցվածքում առկա նյութերի հանդեպ ալերգիա
  
• Անբավարար հյուսվածքային պայմաններ՝ ցանցի լավ ֆիքսացիայի համար
  

Վիրաբույժը գնահատում է պացիենտի ընդհանուր վիճակը և որոշում, թե որ մոտեցումն է առավել նպատակահարմար։

Ցանցի կիրառման մեթոդներ

Ցանցի տեղադրման երկու հիմնական եղանակներ կան․

1. Բաց մեթոդ (Open repair)

Ճողվածքի հատվածում կատարվում է կտրվածք, ցանցը տեղադրվում է մկանային շերտերի վրա կամ դրանց արանքում, ապա վերքը փակվում է։
Հարմար է մեծ կամ կրկնվող ճողվածքների դեպքում։

2. Լապարոսկոպիկ մեթոդ (փոքր կտրվածքներով)

Որովայնի առաջային պատին կատարվում է 3-4 փոքր կտրվածք (մոտ 1սմ), ստեղծվում են մի քանի փոքր անցքեր՝ որոնցով անցկացվում են տեսախցիկ և վիրաբուժական գործիքներ։ Ցանցը տեղադրվում է ներսից։
Առավելություններ՝ քիչ ցավ, հետվիրահատական արագ ապաքինում, փոքր սպիեր։

Ցանցով վիրահատության առավելությունները

Ցանցի կիրառումը փոխում է նախկինում ընդունված մոտեցումը՝ «ձգելու» փոխարեն հյուսվածքները ամրացվում են։ Ահա գլխավոր առավելությունները.

• Կրկնման ավելի ցածր ռիսկ․ Ճողվածքի կրկնման ռիսկը ցանցով վիրահատությունից հետո մոտ 1,5% է, իսկ առանց ցանցի՝ 10-20%
  
• Ավելի քիչ ցավ հետվիրահատական շրջանում
  
• Արագ վերականգնում՝ հիվանդները հաճախ վերադառնում են աշխատանքին 1-2 շաբաթում
  
• Առավել ամուր արդյունք՝ ցանցը դառնում է մարմնի մաս՝ միաձուլվելով հյուսվածքներին
  
• Կիրառելի է բարդ ճողվածքների դեպքում՝ ներառյալ մեծ, կրկնվող կամ հետվիրահատական
  

Ինչ սպասել վիրահատությունից առաջ և հետո

Վիրահատությունից առաջ.

• Կանցկացվեն արյան ընդհանուր և բիոքիմիական քննություններ, սրտի, թոքերի ֆունկցիան գնահատող հետազոտություններ
  
• Հնարավոր է նշանակվի դիետա և աղիքների մաքրում

Վիրահատությունից հետո.

• Ցավ կարող է լինել 1-5 օր, որը կառավարելի է ցավազրկող դեղորայքով
  
• Հնարավոր է դուրսգրում նույն օրը կամ հաջորդ օրը
  
• 1-2 շաբաթ՝ հանգիստ ռեժիմ, ապա աստիճանական ակտիվացում
  
• Ճնշող ծանրություն բարձրացնելուց խուսափել մոտ 4-6 շաբաթ
  

Ամրագրեք ձեր այցը ընդհանուր վիրաբույժ Անդրանիկ Ալեքսանյանի մոտ Միքայելյան համալարսանական հիվանդանոցում՝ Doctor Yan հավելվածի միջոցով և խուսափեք հիվանդանոցային հերթերից։

Հաճախ տրվող հարցեր

Ճողվածքն ունի՞ ռիսկեր, եթե չվիրահատեմ։

Այո։ Չբուժված ճողվածքը կարող է օղակվել՝ հանգեցնելով աղիների մեռուկացման, ինչը վտանգում է կյանքը։

Ցանցը կարո՞ղ է վնասակար ազդեցություն ունենալ։

Ժամանակակից ցանցերը պատրաստվում են կենսահամատեղելի նյութերից։ Ռիսկերը շատ ցածր են, իսկ արդյունքները՝ կայուն։

Ի՞նչպես իմանամ՝ բաց թե լապարոսկոպիկ տարբերակն է ինձ հարմար։

Այդ որոշումը կայացնում են վիրաբույժը և անեսթեզիոլոգը՝ հաշվի առնելով ճողվածքի տեսակը, չափը, ընդհանուր առողջական վիճակը։ Իհարկե որոշումը քննարկվում է պացիենտի հետ։

---

Ամփոփում

Ճողվածքի վիրահատությունը ցանցի կիրառմամբ համարվում է «ոսկե ստանդարտ»՝ ժամանակակից վիրաբուժության մեջ։ Այն ապահովում է ամուր, երկարաժամկետ արդյունք՝ կրկնության նվազագույն հավանականությամբ։

Եթե դուք ունեք ճողվածք, մի սպասեք մինչև բարդանա։ Խորհրդակցեք փորձառու վիրաբույժի հետ, և քննարկեք բուժման տարբերակները՝ ներառյալ ցանցով մեթոդը։

Ձեր հարմարավետությունն ու անվտանգությունը սկսվում են ճիշտ տեղեկացված որոշումից։