Չոր աչքի համախտանիշ. պատճառները, ախտանիշները և բուժումը
Հոդվածը պարտրաստվել է «Անդրոմեդ» ակնաբուժական կենտրոնի հիմնադիր-ղեկավար, ակնաբույժ Ռուբեն Ճաղարյանի հետ համատեղ։
Ի՞նչ է չոր աչքի համախտանիշը
Չոր աչքի համախտանիշը տարածված վիճակ է, որի դեպքում արցունքագեղձերը բավարար արցունք չեն արտադրում կամ արցունքի որակը պակաս արդյունավետ է աչքը խոնավ պահելու համար: Սա կարող է հանգեցնել աչքերի գրգռվածության, այրման զգացողության և տեսողության խանգարումների:
Առաջացման հիմնական պատճառները
Չոր աչքի համախտանիշը կարող է պայմանավորված լինել տարբեր գործոններով՝
- Տարիքը. արցունքների արտադրությունը նվազում է տարիքի հետ:
- Շրջակա միջավայրի գործոնները. քամի, ծուխ, չոր օդ:
- Հորմոնալ փոփոխություններ. հատկապես կանանց մոտ՝ հղիության, դաշտանադադարի կամ հակաբեղմնավորիչների օգտագործման ժամանակ:
- Հիվանդություններ. աուտոիմունային հիվանդություններ (օրինակ՝ Շոգրենի համախտանիշ, ռևմատոիդ արթրիտ):
- Դեղամիջոցներ. հակահիստամիններ, հակադեպրեսանտներ, որոշ արյան ճնշումը կարգավորող դեղամիջոցներ:
- Էկրանների երկարատև օգտագործում. հեռախոսների, համակարգիչների, պլանշետների և այլ էկրանների նայելիս աչքերը հաճախ չեն թարթվում, ինչը նվազեցնում է աչքի լորձաթաղանթի խոնավեցումը:
- Կոնտակտային լինզաների սխալ օգտագործում.
Ախտանիշները
Չոր աչքի համախտանիշի հիմնական ախտանիշներն են՝
- Այրոց կամ գրգռվածություն աչքերում
- Կարմրածություն
- Արցունքահոսություն (արցունքի վատ որակի պատճառով)
- Տեսողության մշուշոտում
- Աչքերի հոգնածություն
- Լուսազգայունություն
Հնարավոր բարդությունները
- Երկարատև գրգռվածություն և անհարմարավետություն
- Աչքի մակերեսի վնասվածքներ՝ խոցեր կամ ինֆեկցիաներ
- Տեսողության թուլացում՝ ծանր դեպքերում
Բուժման եղանակները
- Արցունքային կաթիլներ (արհեստական արցունքներ) – օգնում են խոնավացնել աչքերը:
- Ստերոիդային կաթիլներ – նվազեցնում են բորբոքումը:
- Արցունքային խողովակների փակումը – օգնում է արցունքների կուտակվելուն աչքի մակերեսի վրա:
- Խոնավեցնող գելեր – պաշտպանում են աչքերը չոր միջավայրից:
- Օմեգա-3 ճարպաթթուներ – սննդակարգի փոփոխությունն օգնում է արցունքների որակի բարելավմանը:
- Օգտագործվող դեղամիջոցների վերանայում – որոշ դեղեր կարող են վատթարացնել վիճակը:
Կանխարգելումը
- Խուսափեք երկար ժամանակ էկրանների առջև գտնվելուց:
- Օգտագործեք աչքերի լորձաթաղանթը խոնավեցնող միջոցներ չոր միջավայրում:
- Կրեք արեւային ակնոցներ, եթե շատ ժամանակ եք անցկացնում դրսում:
- Հիշեք հաճախ թարթել աչքերը, հատկապես աշխատելիս:
Երբ դիմել ակնաբույժի
Ակնաբույժի դիմել անհրաժեշտ է, եթե՝
- Աչքերի չորությունը շարունակվում է երկար ժամանակ:
- Առաջանում է տեսողության մշուշոտում կամ երկտեսություն:
- Աչքերում առաջանում է ուժեղ ցավ կամ այտուցվածություն:
- Արագ հոգնածություն կամ անհարմարավետություն եք զգում ընթերցելիս կամ էկրանների առջև աշխատելիս:
- Առկա է աչքի ինֆեկցիա կամ թարախային արտադրություն:
Ակնաբույժ Ռուբեն Ճաղարյանի մոտ ձեր այցը կարող եք ամրագրել Doctor Yan հավելվածի միջոցով՝ խուսափելով հիվանդանոցային հերթերից։ Այցից հետո կարող եք գնահատել Ձեր փորձառությունը, ինչը կօգնի այլ մարդկանց ընտրել բժիշկ։
Եզրակացություն
Չոր աչքի համախտանիշը կարող է խանգարել առօրյա գործունեությանը, բայց համապատասխան խնամքով և բուժմամբ հնարավոր է կանխել բարդությունները և բարելավել կյանքի որակը: Եթե ունեք չոր աչքերի հետ կապված խնդիրներ, դիմեք ակնաբույժի՝ ճիշտ բուժում ստանալու համար: