Սինուսիտ կամ ռինոսինուսիտ․ ի՞նչ է այն, որո՞նք են ախտանիշները և ու՞մ դիմել

Նյութը պատրաստվել է Շենգավիթ բժշկական կենտրոնի թերապևտ Հասմիկ Թումանյանի կողմից։

Ի՞նչ է սինուսիտը

Սինուսիտը կամ ռինոսինուսիտը քթի և հարքթային ծոցերի լորձաթաղանթի բորբոքումն է 28 օրից պակաս տևողությամբ։

Տարածվածությունը

Ունի մեծ տարածվածություն, հատկապես տարվա ցուրտ սեզոններին,երբ ակտիվանում են շնչառական վիրուսները: Այս հիվանդության ժամանակ ամենից հաճախ են հանդիպում ինքնաբուժում, անտիբիոտիկների անհիմն կիրառում, որն իր անբարենպաստ ազդեցությունն է թողում հիվանդության ընթացքի վրա, ձգձգում լավացումը:

Դասակարգումը

Ռինոսինուսիտները դասակարգում ենք հետևյալ կերպ․

Սուր, երբ բորբոքումը տևում է մինչև 4 շաբաթ:
Ենթասուր ,երբ հիվանդության նշանները տևում են 4-12 շաբաթ:
Քրոնիկ, երբ հիվանդության նշանները տևում են 12 շաբաթից ավել :

Կա նաև կրկնվող տեսակ, երբ 4 շաբաթից պակաս տևողությամբ ունենում ենք 4 դրվագ, որոնց միջև լինում է լիարժեք ապաքինում։

Սուր ռինոսինուսիտ

Սուր ռինոսինուսիտները լինում են չբարդացած, երբ բորբոքային պրոցեսի տարածում դեպի աչք, փափուկ հյուսվածքներ կամ նյարդեր չի գրանցվում:

Ավելի հաճախ է հանդիպում միջին տարիքի կանանց և մեծահասակ բնակչության մոտ (45-65 տարեկան)։

Նպաստող գործոնները

Վերին շնչուղիների վարակը
Քթի միջնապատի դեֆորմացիաները կամ այլ անատոմիական առանձնահատկություններ
Պոլիպները
Ալերգիկ ռինիտը, օտար մարմինները
Շաքարային դիաբետը
Ծխելը
Իմունային համակարգի անբավարարությունը և այլն

Հիմնական պատճառական գործոնը վիրուսներն են, միայն որոշ քիչ դեպքերում կարող է միանալ բակտերիալ վարակը։

Ախտանիշները

Հիմնականում հիվանդությունը սկսվում է որպես վերին շնչուղիների սուր վարակ, հարբուխ:Հետո արդեն որոշ ժամանակ անց հիվանդները գանգատվում են․

Թարախանման արտադրությունից քթից,
Քթային շնչառությոն փակվածությունից,
Դեմքի ցավից կամ ճնշման զգացումից, որը կարող է ուժեղանալ գլուխը խոնարհելիս,
Գլխացավից,
Ջերմության բարձրացումից,
Հալիտոզից(բերանի տհաճ հոտ),
Ատամնացավից,
Համի , հոտի զգացողության կորստից

Ախտորոշումը

Ախտորոշման և բուժման համար պետք է դիմել թերապևտին կամ ընտանեկան բժշկին։

Միայն բարդությունների առաջացման կասկածի դեպքում ձեզ կուղղորդեն քիթ-կոկորդ-ականջաբանի կամ այլ մասնագետի մոտ։

Նախնական ախտորոշման համար կարիք չկա հանձնել անալիզներ, ռենտգենգրաֆիան ևս ինֆորմատիվ չէ։

Որոշ դեպքերում կարող է ցուցված լինել քթի հարակից խոռոչների ՀՇ հետազոտությունը։

Անալիզների անհրաժեշտությունը ևս որոշում է բժիշկը (հիմնականում ցուցվում են վարակի բակտերիալ բնույթը պարզելու և հակաբակտերիալ բուժման անհրաժեշտությունը որոշելու համար):

Բուժումը

Վիրուսային ծագման դեպքում հնարավոր է ինքնալավացում, թույլ է տրվում խելամիտ սպասման տակտիկա 5-6 օր: Սակայն սա որոշում է բժիշկը։

Ամրագրեք ձեր այցը Շենգավիթ բժշկական կենտրոնի թերապևտ Հասմիկ Թումանյանի մոտ Doctor Yan հավելվածով կամ doctoryan.am կայքում։

Մանրէային ծագումը տարբերակելու համար բժիշկը ձեզ կնշանակի որոշ անալիզներ , ու կեզրակացնի ,թե ինչ հակաբակտերիալ բուժում է հարկավոր կոնկրետ դեպքում:

Բարդությունները

Սուր սինուսիտների ինքնաբուժումների, ինչպես նաև ուշացած դիմելիության դեպքում հնարավոր են բարդությունների առաջացում:

Բարդություններից են․

Պրեսեպտալ կամ հարակնային ցելյուլիտը,
Ենթապերիօստալ թարախակույտը,
Հարակնային թարախակույտը,
Խոռոչների թրոմբոզը:

Բարդացած դեպքում կլինեն հետևյալ ախտանիշները․

Կայուն, ծանր գլխացավ
Աչքի այտուց, աչքերի շուրջ կարմրություն, ցավ ակնագնդերը շարժելիս
Տեսողության խանգարումներ
Գանգուղեղային նյարդերի վնասում
Պարանոցային մկանների կարկամում
Պտոզ( վերին կոպի կախվածություն)

Բուժման նպատակն է նվազեցնել բորբոքման ախտանիշները , լավացնել քթային շնչառությունը, կանխել բարդությունների առաջացումը: