Դեմքի երիտասարդեցման ժամանակակից եղանակներ

Նյութը պատրաստվել է պլաստիկ և վերականգնողական միկրովիրաբույժ, էսթետիկ վիրաբույժ Հայկ Ենոքյանի հետ համատեղ։

Դեմքի երիտասարդեցումը վերջին տասը տարիների ընթացքում զգալի փոփոխությունների է ենթարկվել։ Եթե նախկինում մարդկանց մեծ մասը մտածում էր միայն մակերեսային միջամտությունների կամ դասական վիրահատական դեմքի ձգման մասին, այսօր մենք՝ պլաստիկ և վերականգնողական միկրովիրաբույժներս, գործում ենք բոլորովին այլ մակարդակում։ Ժամանակակից բժշկությունը հնարավորություն է տալիս համադրել անատոմիական գիտելիքը մինիմալ ինվազիվ տեխնոլոգիաների հետ՝ ստանալով ավելի բնական, երկարատև և անվտանգ արդյունքներ։

Դեմքի ծերացումը միայն կնճիռների հարց չէ․ այն համակցված գործընթաց է, որը ներառում է մաշկի կառուցվածքային փոփոխություններ, ենթամաշկային ճարպաշերտի բաշխման խանգարում, մկանային թուլացում և ոսկրային հենարանի վերափոխում։ Այդ պատճառով դեմքի երիտասարդեցումը պետք է դիտարկել ոչ թե մեկ միջամտության, այլ համալիր մոտեցման տեսանկյունից։ Ստորև կներկայացնեմ այն հիմնական մեթոդները, որոնք այսօր կիրառվում են՝ ելնելով պացիենտի անհատական կառուցվածքից և նպատակներից։

1. Մինիմալ ինվազիվ մեթոդներ

Բոտուլինոթերապիա

Բոտուլինոտոքսինն ընդունված և անվտանգ միջոց է մկանային գերլարվածության հետևանքով առաջացած կնճիռների թուլացման համար։ Այն հատկապես արդյունավետ է ճակատային կնճիռների, «արծվի թևերի» և հոնքերի շրջանում անհամաչափ գծերի համար։ Արդյունքը պահպանվում է շուրջ 4–6 ամիս։

Կարևոր է, որ  այն չի փոխում դեմքի կառուցվածքը, այլ պարզապես հանգստացնում է գերլարված մկանները, ինչի շնորհիվ դեմքի արտահայտությունը դառնում է ավելի հանգիստ ու թարմ։

Ֆիլլերներ (հիալուրոնաթթու, կալցիումի հիդրօքսիապատիտ և այլն)

Ֆիլլերներն օգտագործվում են ծավալի կորուստը վերականգնելու և կոնտուրները շտկելու համար։  Տարիքին զուգահեռ ճարպային «բարձիկները» փոքրանում են, իսկ ոսկրային հենարանը՝ նոսրանում։ Այդ պատճառով ոսկրերը կորցնում են ընդգծվածությունը, քիթ-շրթունքային գծերը խորանում են, բերանի անկյունները իջնում են։

Ֆիլլերը թույլ է տալիս մեղմորեն բարձրացնել այդ հատվածները՝ առանց չափազանցված «լցվածության» էֆեկտի, եթե ճիշտ է ընտրված  նյութն ու տեխնիկան։

Մաշկի որակի բարելավում․ բուստերներ և բիոռեվիտալիզացիա

Այս մեթոդները ուղղված են հենց մաշկի կառուցվածքի վերականգնմանը։ Մաշկը դառնում է ավելի խոնավ, առաձգական, առողջ ու լուսարձակուն։
Բիոռեվիտալիզացիան օգտակար է հատկապես երիտասարդ պացիենտների մոտ՝ վաղ ծերացման կանխարգելման նպատակով։

2. Թելային լիֆտինգ (Thread lifting)

Թելային լիֆտինգը լուծում է այն խնդիրը, որը չի կարելի շտկել միայն ֆիլլերով կամ բոտուլինոթերապիայով՝ մաշկի և հյուսվածքների իջեցումը։

Բինիտային կամ PLLA/PLLA+PLGA թելերը թույլ են տալիս բարձրացնել մեղմորեն կախված հատվածները՝ վերականգնելով այտերի, ստորին ծնոտային գծի և պարանոցի կոնտուրները։

Թելային լիֆտինգի առավելությունները.

• Մինիմալ վնասում
  
• Կարճ և արագ վերականգնման շրջան
  
• Բնական արդյունք
  

3. Լազերային և էներգետիկ սարքավորումներ

Ժամանակակից սարքավորումները (CO₂ լազեր, Er:YAG, RF microneedling և այլն) թույլ են տալիս հասնել ֆրակցիոն վերականգնման՝ խթանելով կոլագենի նոր թելիկների սինթեզը։

Այս մեթոդները հարմար են հետևյալ դեպքերում․

• մաշկի թուլացում ու բարակում,
  
• գունային անհավասարություն,
  
• պիգմենտացիոն փոփոխություններ։
  

Արդյունքները աստիճանաբար ձևավորվում են 2–3 ամսվա ընթացքում, քանի որ կոլագենի կառուցվածքն ունի բնական վերականգնման ցիկլ։

4. Լիպոֆիլլինգ (ճարպային հյուսվածքի փոխպատվաստում)

Լիպոֆիլլինգն արդեն երկար տարիներ համարվում է դեմքի բնական երիտասարդեցման ամենաանվնաս և ֆունկցիոնալ կանոններից մեկը։
Պացիենտի սեփական ճարպային հյուսվածքը վերցվում է մարմնի մեկ հատվածից և տեղադրվում այնտեղ, որտեղ ծավալը նվազել է։

Այս մեթոդի առավելությունները.

• բնական նյութի կիրառում՝  առանց օտար մարմնի,
  
• երկարատև արդյունք,
  
• ճարպային ցողունային բջիջների դրական ազդեցություն մաշկի որակի վրա։
  

5. Վիրահատական երիտասարդեցում (Facelift)

Այն դեպքերում, երբ թուլացած հյուսվածքները զգալի չափով իջած են, իսկ մաշկը կորցրել է այնքան առաձգականություն, որ ոչ վիրահատական մեթոդներն այլևս չեն ապահովում բավարար վերականգնում, կիրառվում է վիրահատական մոտեցումը՝ SMAS facelift կամ Deep Plane facelift։

Այս մոտեցումն ուղղված է ո՛չ միայն մաշկի ձգմանը, այլ խորը հյուսվածքների վերադասավորմանը, ինչը ապահովում է երկարատև և բնական արդյունք՝ առանց արհեստական  էֆեկտի։

Վերականգնման շրջանը տարբերվում է՝ կախված միջամտության ծավալից, սակայն արդյունքը սովորաբար պահպանվում է 10–15 տարի։

Ինչպե՞ս ընտրել ճիշտ մեթոդը

Յուրաքանչյուր պացիենտ ունի յուրահատուկ անատոմիա, հյուսվածքային տարբեր բնութագրեր, մաշկի որակ և գենետիկ բնութագրեր։ Այդ պատճառով դեմքի երիտասարդեցումը պետք է լինի անհատականացված։

Պլաստիկ վիրաբույժի համար կարևոր է ուսումնասիրել.

• մաշկի տոնուսը,
  
• այտերի ծավալը,
  
• ստորին ծնոտային գծի սահմանները,
  
• պարանոցի վիճակը,
  
• մկանային ակտիվությունը,
  
• պացիենտի սպասելիքները։
  

Միայն այս ամբողջական պատկերը կարող է ցույց տալ՝ որ մեթոդն է առավել արդյունավետ տվյալ մարդու համար։ Հաճախ լավագույն արդյունքը ստացվում է մեթոդների համակցումով՝ օրինակ՝ բոտուլինո + ֆիլլեր + լազերային թարմացում։

Ամփոփում

Դեմքի երիտասարդեցումը այսօր արդեն միայն կնճիռների պայքար չէ։ Այն համալիր գործընթաց է, որի հիմքում ընկած է հյուսվածքների բնական դիրքի վերականգնումը, ծավալի ճիշտ բաշխումը և մաշկի որակի բարելավումը։

Ժամանակակից տեխնոլոգիաները թույլ են տալիս հասնել բնական, հանգիստ և երկարատև արդյունքների՝ նվազագույն ցավով և առանց երկարատև աշխատանքային դադարի։ Այստեղ ամենակարևորն է ճիշտ գնահատումն ու մասնագիտական մոտեցումը։

Եթե նկատում եք, որ դեմքի ուրվագծերը փոխվել են, գծերը դարձել են ավելի խորը, մաշկը կորցրել է առաձգականությունը, ճիշտ կլինի դիմել հմուտ պլաստիկ և վերականգնողական միկրովիրաբույժի։ Ժամանակին ճիշտ ընտրված միջամտությունը թույլ է տալիս երկար պահպանել դեմքի երիտասարդ ու թարմ տեսքը՝ առանց չափազանցված էֆեկտների։

Ամրագրեք ձեր այցը պլաստիկ և վերականգնողական միկրովիրաբույժ, էսթետիկ վիրաբույժ Հայկ Ենոքյանի մոտ Doctor Yan հավելվածով կամ doctoryan.am կայքում՝ առանց զանգի։