Թոքաբորբերը երեխաների մոտ
Նյութը պատրաստվել է մանկաբույժ Անահիտ Գրիգորյանի կողմից։
Թոքաբորբը (լատ. pneumonia) հանդիսանում է թոքերի բորբոքային հիվանդություն, որը կարող է առաջանալ բակտերիալ, վիրուսային կամ ավելի հազվադեպ սնկային ախտածինների պատճառով:
Այն շարունակում է մնալ երեխաների շրջանում հիմնական հիվանդացության և մահացության պատճառներից մեկը, հատկապես մինչև 5 տարեկան երեխաների մոտ:
Ռիսկի խումբ
Թոքաբորբի ծանր ընթացքի ռիսկի խմբում են․
- 2 տարեկանից փոքր երեխաները,
- ուղեկցող քրոնիկ հիվանդություններ ունեցող երեխաները,
- թերի պատվաստված երեխաները։
Նշաններ և ախտանիշներ
- Բարձր ջերմություն, հաճախ ≥38°C
- Հազ
- Շնչառության հաճախության բարձրացում
- Ոախորժակի նվազում, շնչառության դժվարություն, կապտություն
Ախտորոշումը
Թոքաբորբի ախտորոշումը հիմնականում հիմնված է բժշկի ֆիզիկական հետազոտության վրա։ Ախտորոշման լրացուցիչ միջոցներ կարող են լինել թոքերի ռենտգեն հետազոտությունը՝ բորբոքային պրոցեսի տեղակայմխն և ծավալի գնահատման համար, ինչպես նաև լաբորատոր հետազոտություններ, օրինակ՝ արյան ընդհանուր քննություն և C-ռեակտիվ սպիտակուցի մակարդակի չափում, անհրաժեշտության դեպքում՝ միկրոբիոլոգիական նմուշառումներ՝ ախտածնի ճշգրիտ հայտնաբերման համար:
Բուժումը
Բուժումն ուղղված է թոքաբորբի պատճառի վերացմանն ու ծանրության աստիճանին:
Բակտերիալ թոքաբորբի դեպքում նշանակվում են համապատասխան հակաբիոտիկներ՝ ըստ տարիքային ցուցումների և հնարավոր էթիոլոգիայի:
Վիրուսային թոքաբորբի դեպքում հիմնականում կիրառվում է համախտանիշային մոտեցում՝ հանգիստ, բավարար հիդրացիա և ջերմության վերահսկում:
Բարդ դեպքերում, հատկապես փոքր տարիքի երեխաների կամ ծանր շնչառական խանգարումների ժամանակ, անհրաժեշտ է հոսպիտալացում, թթվածնային աջակցություն կամ ինտենսիվ թերապիա:
Ախտորոշման և բուժման ճիշտ կազմակերպումը կարևոր է լիարժեք առողջացման և հետագայում հնարավոր բարդությունների կանխարգելման համար:
Ամրագրեք Ձեր այցը մանկաբույժ Անահիտ Գրիգորյանի մոտ Մուրացան Համալսարանական Հիվանդանոցում կամ ամրագրեք տնային այց՝ Doctor Yan հավելվածի միջոցով։
Ամփոփում
Թոքաբորբը մանկական տարիքում հաճախ հանդիպող, բայց կանխարգելելի և բուժելի հիվանդություն է: Ռիսկային խմբերում գտնվելու դեպքում բժշկական հսկողությունն ու ժամանակին ստացած բուժումը հնարավորություն են տալիս ամբողջական առողջացման և հետագա բարդությունների կանխարգելման:
Հարցերի դեպքում զանգահարեք 8507 կարճ համարով։