Պարանոցի ցավ. երբ է դա պարզապես անհարմարություն, և երբ պետք է դիմել նյարդաբանի

Նյութը պատրաստվել է «Նաիրի» ԲԿ-ի և ԷկոՍենս ախտորոշման կենտրոնի նյարդաբան Անուշ Գասպարյանի հետ համատեղ։

Պարանոցի ցավը ժամանակակից աշխարհում ամենատարածված խնդիրներից է։ Ժամանակակից կենսակերպը՝ երկարաժամկետ նստակյաց աշխատանք, հեռախոսի և համակարգչի սխալ դիրքով օգտագործում, սթրեսն ու քնի խանգարումները՝ բոլորն էլ կարող են պատճառ դառնալ պարանոցի շրջանում ցավի, ձգվածության և շարժունակության սահմանափակման։

Բայց երբ է այդ ցավը պարզապես մկանային լարվածություն, իսկ երբ՝ նյարդաբանական լուրջ խնդրի նշան։ Դիտարկենք մանրամասն։

Պարանոցի ցավի հնարավոր պատճառները

Պարանոցի ցավը կարող է ունենալ տարբեր ծագում՝ մկանային, ոսկրային, հոդային, կամ նյարդային։ Ահա առավել հաճախ հանդիպող պատճառները՝

1. Մկանային լարվածություն կամ ձգում

Սխալ դիրքով նստելը, համակարգչի առջև երկար մնալը, հանկարծակի կտրուկ շարժումները կամ քնի ժամանակ պարանոցի սխալ դիրքը կարող են առաջացնել մկանային գերլարվածություն։

2. Օստեոխոնդրոզ / դեգեներատիվ փոփոխություններ

Տարիքի հետ պարանոցի ողերը և միջողնային սկավառակները «մաշվում» են։ Սա կարող է բերել սկավառակի բարակեցման, նյարդային արմատների սեղմման և քրոնիկ ցավի։

3. Միջողնային սկավառակի ճողվածք

Երբ միջվողնային սկավառակը սեղմվում է և նրա ներսում առկա դոնդողանման նյութը հրվում է դուրս և սեղմում է նյարդային արմատները՝ առաջացնելով սուր ցավեր, որոնք կարող են տարածվել մինչև ուս կամ ձեռք։

4. Ցերվիկալ ստենոզ / ողնուղեղի կամ նյարդային արմատների սեղմում

Ողնաշարային խողովակի նեղացումը կարող է հանգեցնել զգայունության և շարժողականության խանգարումների։

5. Ցնցում կամ վնասվածք

Վթարները, ընկնելը կամ այլ վնասվածքները  կարող են խախտել պարանոցի հյուսվածքների ամբողջականությունը, ներառյալ ողերը և նյարդերը։

6. Ինֆեկցիա կամ բորբոքում

Բակտերիալ կամ վիրուսային վարակի հետևանքով երբեմն հնարավոր է պարանոցի ցավ և կարկամություն (օր.՝ մենինգիտ)։

Ախտանիշները, որոնք հուշում են նյարդաբանական խնդրի մասին

Պարանոցի ցավը միշտ չէ, որ պահանջում է նյարդաբանի միջամտություն։ Սակայն, կան որոշ ախտանիշներ, որոնք կարող են վկայել նյարդաբանական պատճառների մասին և պահանջում են մասնագիտական հետազոտություն։

Դիմեք նյարդաբանի, եթե՝

• Ցավը տարածվում է դեպի ուս, ձեռքեր կամ մատներ
  
• Ցավին զուգորդվում են ծակծկոցներ, թմրածություն կամ այրոցի զգացում վերջույթներում
  
• Առկա է մկանային թուլություն՝ ձեռքի բարձրացումը կամ առարկա բռնելը դժվար է
  
• Ցավը չի մեղմանում նույնիսկ դեղորայք ընդունելուց կամ հանգստանալուց հետո
  
• Ցավն ուղեկցվում է գլխապտույտով, քնկոտությամբ կամ շարժողական խանգարումներով
  
• Դիտվում է միզարձակման կամ աղիքային վերահսկողության կորուստ
  

Այս ախտանիշները կարող են վկայել ողնուղեղի կամ նյարդային արմատների սեղմման, բորբոքման, դեղորայքային թերապիայի կամ վիրահատության կարիք ունեցող պաթոլոգիայի մասին։

Ամրագրեք ձեր այցը նյարդաբան Անուշ Գասպարյանի մոտ Doctor Yan հավելվածով կամ Doctoryan.am կայքում՝ առանց զանգերի և ժամանակի ավելորդ կորստի։

Որն է նյարդաբանի դերը

Նյարդաբանը կարող է՝

• կատարել մանրամասն նյարդաբանական զննում,
  
• նշանակել պատկերային հետազոտություններ՝ ՄՌՏ, ՃՄՌՏ, նյարդերի ՈՒՁՀ ,
  
• պարզել՝ արդյո՞ք ցավի պատճառը նյարդաբանական ծագում ունի,
  
• ապահովել դեղորայքային կամ թերապևտիկ համապատասխան բուժում,
  
• անհրաժեշտության դեպքում ուղղորդել այլ մասնագետների խորհրդատվության։
  

Բուժման մեթոդները

Պարանոցի ցավի բուժումը կախված է պատճառից։ Ընդհանուր մոտեցումներն են՝

1. Պահպանողական բուժում

• Հանգիստ և շարժումների սահմանափակում սուր փուլում
  
• Ցավազրկողներ և բորբոքումը նվազեցնող դեղեր (օրինակ՝ իբուպրոֆեն, դիկլոֆենակ)
  
• Մկանների լարվածությունը թուլացնող դեղամիջոցներ
  
• Ֆիզիոթերապիա, թուլացնող վարժանքներ, մերսում
  
• Շարժողական վարժանքներ և մկանների ամրացում
  

2. Բարդ դեպքերում՝ ինվազիվ միջամտություններ

• Ստերոիդային ներարկումներ նյարդային արմատի մոտ՝ ուժեղ բորբոքման ժամանակ
  
• Ապարատային բուժում (օր.՝ լազեր, մագնիսաթերապիա, շոքեթերապիա)
  
• Վիրահատական միջամտություն՝ սկավառակի ճողվածքի, ստենոզի կամ լուրջ սեղմման դեպքերում։

Ինչպես կանխել պարանոցի ցավը

Պարանոցի ցավից խուսափելու համար անհրաժեշտ է՝

• Ուշադիր հետևել մարմնի դիրքին՝ նստելիս, քնելիս, մեքենա վարելիս
  
• Սեղանին աշխատելիս՝ մոնիտորը պետք է լինի աչքերի մակարդակին, գոտկատեղը՝ սեղանին մոտ
  
• Պարբերաբար ընդմիջումներ անել՝ նստակյաց աշխատանքից յուրաքանչյուր 30-60 րոպեն մեկ շարժվել
  
• Ճիշտ բարձ օգտագործել քնելու ժամանակ՝ ոչ շատ բարձր կամ ցածր
  
• Ֆիզիկական ակտիվություն և պարանոցի մկանների ամրապնդում
  
• Սթրեսի կառավարում՝ սթրեսը հաճախ հանգեցնում է մկանային կծկումների
  

Ամփոփում

Պարանոցի ցավը կարող է լինել անցողիկ անհարմարություն, բայց որոշ դեպքերում այն ազդանշան է ավելի լուրջ՝ նյարդաբանական խնդրի։ Եթե ցավը ուղեկցվում է թմրածությամբ, ցավի տարածմամբ կամ մկանային թուլությամբ, դիմեք նյարդաբանի՝ ժամանակին ախտորոշման և արդյունավետ բուժման համար։ Ժամանակին արձագանքելը կարող է կանխել բարդությունները և վերականգնել ձեր կյանքի որակը։

Ամրագրեք ձեր այցը նյարդաբան Անուշ Գասպարյանի մոտ Doctor Yan հավելվածով կամ Doctoryan.am կայքում