Ուսահոդի արթրոսկոպիկ միջամտություն. ի՞նչ է այն և երբ է անհրաժեշտ

Նյութը պատրաստվել է վնասվածքաբան-օրթոպեդ, սպորտային վնասվածքաբան, արթրոսկոպիստ Գրիգոր Ավետյանի հետ համատեղ։

Ուսի ցավերը և շարժումների սահմանափակումները բազմաթիվ մարդկանց մոտ կարող են պայմանավորված լինել հոդի կառուցվածքային խնդիրներով՝ հոդի ներսում առաջացած վնասվածքներից մինչև խրոնիկ բորբոքային վիճակներ։ Այս խնդիրները հաճախ հնարավոր է հայտնաբերել և բուժել առանց բաց վիրահատության՝ արթրոսկոպիկ եղանակով։

Ի՞նչ է ուսահոդի արթրոսկոպիան

Ուսահոդի արթրոսկոպիան մինիմալ ինվազիվ վիրահատական միջամտություն է, որի ընթացքում հատուկ տեսախցիկը՝ արթրոսկոպը, ներմուծվում է ուսահոդի մեջ փոքր կտրվածքով։ Այս սարքը ցույց է տալիս հոդի ներսի պատկերը մոնիտորի վրա՝ հնարավորություն տալով վիրաբույժին տեսնել և գնահատել հոդի կառուցվածքը և միաժամանակ կատարել անհրաժեշտ բուժական միջամտություններ։

Ցուցումներ

Ուսահոդի արթրոսկոպիան կարող է առաջարկվել մի շարք խնդիրների դեպքում՝ մասնավորապես երբ այլ պահպանողական մեթոդները (ֆիզիոթերապիա, դեղորայք, ներարկումային թերապիա) արդյունավետ չեն լինում։ Տիպիկ ցուցումներն են՝

Պտտող մանժետի պատռվածքներ
Ուսի կայունության խանգարումներ և կրկնվող հոդախախտեր
Հոդաշուրթը պատռվելու դեպքեր
Արթրոզի որոշ ձևեր
Արթրոֆիբրոզ (հոդի շարժումների սահմանափակում)
Բուրսիտներ և տենդոնիտներ
Սինովիալ հեղուկի բորբոքում կամ դրա քանակի չափից դուրս աճ

Ամրագրեք ձեր այցը վնասվածքաբան-օրթոպեդ, սպորտային վնասվածքաբան, արթրոսկոպիստ Գրիգոր Ավետյանի մոտ Doctor Yan հավելծով կամ Doctoryan.am կայքում՝ առանց զանգերի։

Հարցերի դեպքում զանգահարեք Doctor Yan-ի աջակցման կենտրոն՝ 8507 կարճ համարով։

Հակացուցումներ

Չնայած միջամտությունն ընդհանուր առմամբ անվտանգ է, որոշ դեպքերում այն կարող է հակացուցված լինել՝

Ուսահոդի խիստ արթրոզ, երբ հոդային մակերեսներն արդեն շատ են քայքայվել
Հոդի սուր բորբոքում
Ընդհանուր առողջական վիճակ, որը վիրահատության ռիսկերը բարձր է դարձնում (օրինակ՝ չկառավարվող սրտանոթային հիվանդություններ, արյան մակարդելիության խանգարումներ)

Ինչպես է ընթանում միջամտությունը

Միջամտությունն իրականացվում է ընդհանուր կամ հաղորդչական անզգայացման պայմաններում ՝ կախված պացիենտի վիճակից և վիրաբույժի որոշումից։

Վիրաբույժը 2-3 փոքր կտրվածքով (մոտ 0.5 սմ) անհրաժեշտ գործիքները ներմուծում է հոդային խոռոչ։ Հատուկ լուծույթով լվացվում է հոդային խոռոչը, որպեսզի պատկերը հստակ լինի։ Այնուհետև կատարվում է պատռված կամ վնասված կառուցվածքների վերականգնում, մաքրում կամ հեռացում։

Միջամտությունը սովորաբար տևում է 30-90 րոպե՝ կախված խնդիրների ծավալից։

Վիրահատությանը պատրաստվելը

Նախքան վիրահատությունը պացիենտը անցնում է համալիր նախավիրահատական ստուգում՝ ներառյալ արյան անալիզներ, սիրտանոթային համակարգի հետազոտություններ, ինչպես նաև ուսահոդի ՄՌՏ կամ ուլտրաձայնային հետազոտություն։

Պացիենտին խորհուրդ է տրվում՝

Չընդունել սնունդ միջամտությանը նախորդող 6-8 ժամերին
Տեղեկացնել բժշկին օգտագործվող բոլոր դեղերի մասին
Ժամանակավորապես դադարեցնել արյան մակարդելիությունը նվազեցնող դեղերի ընդունումը, ըստ բժշկի հանձնարարականի

Վերականգնման ընթացքը

Արթրոսկոպիկ միջամտությունից հետո վերականգնման շրջանը, ընդհանուր առմամբ, ավելի կարճ և քիչ ցավոտ է, քան բաց վիրահատությունից հետո։

Միջամտությունից հետո՝

Ձեռքը պահվում է անշարժացնող հարմարանքով կամ օրթեզով մի քանի օրից մինչև մի քանի շաբաթ
Սկզբնական շրջանում նշանակվում են ցավազրկողներ և սառը փաթեթների տեղադրում՝ այտուցն ու ցավը նվազեցնելու համար
Մշտական վերահսկողություն՝ բորբոքումից կամ վարակի նշաններից խուսափելու համար
Ֆիզիոթերապիան սկսվում է աստիճանաբար՝ սկզբում պասիվ, ապա ակտիվ շարժումների ներգրավմամբ

Լիարժեք վերականգնումը կարող է տևել մի քանի շաբաթից մինչև մի քանի ամիս՝ կախված միջամտության տեսակից և պացիենտի անհատական առանձնահատկություններից։

Հնարավոր բարդություններ

Չնայած որ ուսահոդի արթրոսկոպիան համարվում է անվտանգ միջամտություն, երբեմն կարող են առաջանալ բարդություններ, ինչպիսիք են՝

Բորբոքում
Արյունահոսություն
Հոդի շարժունակության սահմանափակում
Խնամքի և վերականգնման ցուցումների չպահպանման հետևանքով առաջացած խնդիրներ

Ամփոփում

Ուսահոդի արթրոսկոպիան այսօր հնարավորություն է տալիս արդյունավետ լուծել ուսահոդի բազմաթիվ խնդիրներ՝ նվազագույն ինվազիվության, արագ վերականգնման և բարձր արդյունավետության պայմաններում։ Այն հատկապես օգտակար է այն մարդկանց համար, ովքեր տառապում են ուսի քրոնիկ ցավից, շարժման սահմանափակումից կամ ունեն վնասվածք հոդի ներսում։

Եթե ունեք նման ախտանիշներ և պահպանողական բուժումը արդյունք չի տալիս, արժե խորհրդակցել օրթոպեդի հետ։ Ժամանակին կատարված ճիշտ միջամտությունը կարող է վերականգնել կյանքի որակը և կանխել հետագա բարդությունները։