Ամեն ինչ թութքի մասին՝ ռիսկերը, ախտանիշները և բուժման մեթոդները

Նյութը պատրաստվել է Իզմիրլյան ԲԿ-ի վիրաբույժ-պրոկտոլոգ Արման Հովհաննիսյանի հետ համատեղ։

Թութքը լայն տարածում ունեցող հիվանդություն է, որը կարող է հանդիպել կյանքի տարբեր փուլերում՝ կախված ապրելակերպից, գենետիկ նախատրամադրվածությունից և առողջական ընդհանուր վիճակից։ Շատերը խուսափում են խոսել այդ մասին, սակայն վաղ ախտորոշումը և բուժման մեթոդի ճիշտ ընտրությունը կարող են կանխել լուրջ բարդությունների առաջացումը։

Ինչ է թութքը

Թութքը ուղիղ աղիքում գտնվող երակային հանգույցների լայնացումն է, որը կարող է առաջացնել ցավ, այրոց, քոր, արյունահոսություն և տհաճ զգացողություններ։ Կան երկու հիմնական տիպ՝

Ներքին թութք – զարգանում է ուղիղ աղիքի ներսում և հաճախ ի սկզբանե ցավ չի պատճառում։
Արտաքին թութք – առաջանում է մաշկի տակ՝ անալ անցքի շուրջ, և հաճախ ուղեկցվում է ցավով, այտուցով կամ արյունահոսությամբ։

Ովքե՞ր են ռիսկի խմբում

Թութքի զարգացման ռիսկը բարձրանում է որոշ գործոնների առկայությամբ.

Նստակյաց կենսակերպ – օրինակ՝ գրասենյակային աշխատանք։
Սխալ սննդակարգ– քիչ մանրաթելերով և ջրով սնունդ։
Փորկապություն կամ լուծ– որոնք անընդհատ ճիգեր են պահանջում։
Ծանր ֆիզիկական աշխատանք– մասնավորապես առանց մկանային համակարգի բավարար զարգացվածության։
Հղիություն– քանի որ ներորովայնային ճնշման բարձրացումն ազդում է փոքր կոնքում արյան շրջանառության վրա։
Ժառանգական նախատրամադրվածություն։
Տարիք, քանի որ տարիքի հետ անոթային և հյուսվածքային տոնուսը նվազում է։

Վաղ ախտանիշները

Թութքի վաղ փուլում ախտանիշները կարող են լինել մեղմ ու աննկատելի՝

Ծանրության զգացողություն անալ շրջանում։
Քոր կամ թեթև այրոց։
Արյան առկայություն զուգարանի թղթի վրա։
Դիսկոմֆորտ նստելու ժամանակ։

Ուշ ախտանիշները

Եթե անտեսվում են վաղ նշանները, թութքը գնալով պրոգրեսիվում է դեպի ուշ փուլեր՝

Ուռած, ցայտուն թութքային հանգույցներ։
Մշտական ցավ՝ քայլելու կամ նստելու ժամանակ։
Բազմակի արյունահոսություն՝ անգամ առանց զուգարան գնալու։
Թութքային հանգույցների թրոմբոզ (ստրանգուլյացիա)։
Լորձի արտահոսք։
Սրտխառնոց և ընդհանուր թուլություն՝ արյունային կորուստի ֆոնին։

Թութքի բարդությունները

Չբուժված թութքը կարող է առաջացնել լուրջ առողջական խնդիրներ, ինչպիսիք են՝

Թրոմբված հանգույցներ, որոնք շատ ցավոտ են և պահանջում են անհետաձգելի բուժում։
Մեռուկացած հանգույց, որը կարող է առաջացնել վարակ։
Քրոնիկ արյունահոսություն, ինչը հանգեցնում է սակավարյունության։
Ուղիղ աղիքի պարբերական բորբոքումներ և վարակներ։

Բուժման մեթոդները

Բուժումն ընտրվում է՝ կախված փուլից և ախտանիշների ծանրությունից։

Ամրագրեք ձեր այցը վիրաբույժ-պրոկտոլոգ Արման Հովհաննիսյանի մոտ Doctoryan.am կայքում կամ Doctor Yan հավելվածով, կամ զանգահարելով Doctor Yan-ի աջակցման կենտրոն՝ 095608880 հեռախոսահամարով։

Պահպանողական մոտեցում (առաջին և երկրորդ փուլ)

Սննդակարգի կարգավորում՝ մեծացնել մանրաթելերի և ջրի ընդունումը։
Փորկապության դեմ միջոցներ։
Տեղային քսուքներ և մոմիկներ՝ ցավը և բորբոքումը մեղմելու համար։
Տաք լոգանքներ՝ 15-20 րոպեով օրական մի քանի անգամ։
Դեղորայքային բուժում՝ անոթների ամրացման համար (օրինակ՝ ֆլավոնոիդներ)։

Վիրաբուժական բուժում

Եթե պահպանողական բուժման արդյունքում չենք ունենում դրական դինամիկա, կամ թութքը բարդանում է, անհրաժեշտ է վիրահատական միջամտություն․

Ինֆրակարմիր ճառագայթներով կոագուլյացիա։
Ռեզինե օղակով կապում (rubber band ligation)։
Սկլերոթերապիա։
Լազերային բուժում։
Թութքահատում՝ վիրահատական հեռացում ծանր դեպքերում։

Երբ դիմել պրոկտոլոգի

Շատերը փորձում են ինքնուրույն բուժվել, սակայն անհրաժեշտ է դիմել մասնագետի, եթե՝

Արյուն եք նկատում զուգարանի թղթի վրա։
Թութքի հանգույցներն արդեն շոշափվում են։
Ունեք քորի, այրոցի կամ ցավի զգացողություն հետանցքի շրջանում։
Առկա է տևական փորկապություն կամ լուծ։

Վիրահատությունից հետո. վերականգնողական շրջան

Վիրահատական բուժումից հետո շատ կարևոր է վերականգնման ճիշտ ընթացքը՝

Առաջին օրերին հանգիստ և անկողնային ռեժիմ։
Ցավազրկողներ՝ ըստ բժշկի ցուցման։
Հիգիենա՝ տաք լոգանքներ և հետանցքի հատվածի մաքրություն։
Փափուկ սնունդ, մանրաթելերով և հեղուկով հարուստ։
Միզարձակման և աղիքների գործունեության կանոնավորեցում՝ փորկապությունից խուսափելու համար։
Ֆիզիկական ակտիվություն միայն բժիշկի թույլտվությամբ՝ աստիճանաբար։

Սովորաբար լիարժեք վերականգնումը տևում է 2-4 շաբաթ՝ կախված միջամտության ձևից։

Որոշ կանխարգելիչ խորհուրդներ

Սնվեք մանրաթելերով հարուստ՝ մրգեր, բանջարեղեն, վարսակ, չորացրած պտուղներ։
Օրվա ընթացքում խմեք առնվազն 1.5-2 լիտր ջուր։
Խուսափեք երկար նստելուց՝ հատուկ բարձիկներ օգտագործեք։
Ունեցեք ֆիզիկական ակտիվություն – թեթև քայլքեր, յոգա կամ լող։
Մի՛ հետաձգեք զուգարան գնալը։

Ամփոփում

Թութքը հաճախակի, բայց բուժելի խնդիր է։ Եթե ժամանակին նկատեք նշանները և դիմեք պրոկտոլոգի, ապա կկարողանաք խուսափել վիրահատությունից ու բարդություններից։ Մի՛ ամաչեք հոգ տանել ձեր առողջության մասին։ Հիշեք՝ խնդրի անտեսումը երբեք լուծում չէ։