Ի՞նչ է վուլվովագինիտը և ինչ պետք է իմանալ դրա մասին
Նյութը պատչաստվել է մանկաբարձ գինեկոլոգ, մանկական գինեկոլոգ Մարիամ Մնացականյանի կողմից։
Վուլվովագինիտը կանանց ամենատարածված գինեկոլոգիական խնդիրներից է, որը բնութագրվում է արտաքին սեռական օրգանների (վուլվա) և հեշտոցի բորբոքումով։ Այն կարող է հանդիպել ցանկացած տարիքի կանանց, այդ թվում՝ երեխաների և հետդաշտանադադարային կանանց մոտ։
Վուլվովագինիտի ախտանիշներն են`
Վուլվովագինիտի առաջացման պատճառները բազմազան են, և հաճախ տարբեր գործոններ կարող են միաժամանակ նպաստել խնդրի զարգացմանը։
Վարակներ
-Բակտերիալ վագինոզ (հաճախ կապված է Gardnerella vaginalis-ի գերաճով)
-Սնկային վարակներ (Candida albicans)
-Վիրուսային վարակներ (հատկապես՝ հերպես վիրուս)
-Պարազիտային վարակներ, օրինակ՝ տրիխոմոնիազ (Trichomonas vaginalis)
Ոչ-վարակային գործոններ
-Ալերգիկ ռեակցիաներ սանհիգիենիկ միջոցների, լվացքի փոշիների, լաթե ներքնաշորերի նկատմամբ
-Քիմիական գրգռիչներ՝ օճառներ, լոգանքի գելեր, բուրավետ սրբիչներ
-Հորմոնալ փոփոխություններ՝ էստրոգենի նվազում (հատկապես՝ հետմենոպաուզայում)
-Սեռական հարաբերությունների ժամանակ առաջացած վնասվածքներ
-Օտար մարմին (օրինակ՝ մոռացված տամպոն)
Վուլվովագինիտի ախտանիշները
Վուլվովագինիտի ախտանիշները կարող են տարբեր լինել կախված պատճառից, սակայն առավել հաճախ հանդիպում են հետևյալները.
✔ Քոր և այրոց վուլվայի և հեշտոցի շրջանում
✔ Հեշտոցի արտադրություն՝ փոփոխված գույնով, հոտով կամ չափով
✔ Ցավ սեռական հարաբերության կամ միզարձակման ժամանակ
✔ Կարմրություն, այտուցվածություն, երբեմն՝ մաշկի վնասվածքներ
✔ Հնարավոր է ընդհանուր թուլություն, տհաճ զգացողություն
Ինչպե՞ս է տարբերակվում պատճառը
Բժիշկը տարբերակելու համար կիրառում է.
- Հեշտոցի և արտաքին սեռական օրգանների զննություն
- Միկրոսկոպիկ հետազոտություն
- Լաբորատոր անալիզներ՝ ցանքս, ՊՇՌ թեստեր
- pH մակարդակի որոշում
Ճիշտ ախտորոշումը կարևոր է, քանի որ տարբեր պատճառներ ունեն տարբեր բուժում։
Բուժման մեթոդները
Բուժումը կախված է վուլվովագինիտի պատճառից.
- Բակտերիալ վագինոզ՝ հակաբիոտիկներ
- Սնկային վարակ՝ հակասնկային դեղամիջոցներ
- Վիրուսային վարակներ՝ հակավիրուսային միջոցներ
- Տրիխոմոնիազ՝ հակամանրէային միջոցներ
- Ոչ-ինֆեկցիոն պատճառների դեպքում՝ գրգռիչների բացառում, հակաբորբոքային կրեմներ, անհրաժեշտության դեպքում՝ հորմոնալ բուժում (հետդաշտանադադարային տարիքում)
Պետք չէ՛ զբաղվել ինքնաբուժմամբ, քանի որ վուլվովագինիտը բազմապատճառային հիվանդություն է, և տարբեր բուժառուների դեպքում կարող են արդյունավետ լինել բուժման տարբեր մեթոդներ։
Ա,մրագրեք ձեր այցը մանկաբարձ-գինեկոլոգ Մարիամ Մնացականյանի մոտ Doctoryan.am կայքում կամ Doctor Yan հավելվածի միջոցով և ստացեք ճշգրիտ ախտորոշում և բուժում՝ խուսափելով զանգերից և հիվանդանոցային հերթերից։
Բացի դեղորայքային բուժումից, խորհուրդ է տրվում.
- Կրել բամբակյա ներքնաշոր, խուսափել սինթետիկ նյութերից
- Խուսափել օճառներից և հիգիենիկ միջոցներից, որոնք պարունակում են գրգռիչ նյութեր
- Պահպանել անձնական հիգիենա
- Սեռական կյանքի ժամանակ՝ անհրաժեշտության դեպքում օգտագործել պահպանակ
Հնարավոր բարդություններ
Չբուժված կամ սխալ բուժված վուլվովագինիտը կարող է առաջացնել.
- Վերարտադրողական օրգանների ավելի խոր շերտերի վարակ
- Քրոնիկական քոր և ցավ
- Հղիության բարդություններ՝ վաղաժամ ծննդաբերություն, վիժում (հատկապես ինֆեկցիոն պատճառների դեպքում)
- Սեռական կյանքի որակի անկում
- Վարակի տարածում սեռական զուգընկերոջը
Ամփոփում
Վուլվովագինիտը տարածված խնդիր է, որը կարող է զգալիորեն ազդել կնոջ կյանքի որակի վրա։ Ճիշտ ախտորոշումը, ժամանակին բուժումը և կանխարգելիչ միջոցառումները թույլ են տալիս արագ վերականգնել առողջությունը և կանխել բարդությունները։
Խորհուրդ է տրվում վուլվովագինիտի ախտանիշների ի հայտ գալու դեպքում չզբաղվել ինքնաբուժմամբ, այլ դիմել գինեկոլոգի։ Առողջության նկատմամբ ուշադրությունը կանխում է լուրջ խնդիրների առաջացումը։