Ծնկի ցավը երեխաների շրջանում
Ծնկի ցավը երեխաների շրջանում տարածված խնդիր է, որն անհանգստացնում է ծնողներին և խնամակալներին։ Երեխաները տարբերվում են իրենց ակտիվ կենսակերպով և անսպառ էներգիայով, սակայն նրանց կմախքամկանային համակարգը լիարժեք ձևավորված չէ։ Ծնկի ցավի պատճառների, ուղեկցող ախտանիշների ու հնարավոր բարդությունների իմացությունը կօգնի ծնողներին ժամանակին կանխարգելել բարդությունների զարգացումը։
Ծնկի ցավի պատճառները երեխաների շրջանում
Երեխաների մոտ ծնկի ցավը կարող է պայմանավորված լինել բազմաթիվ գործոններով, ինչպիսիք են․
- Աճման ցավեր – Երեխաների մոտ ծնկի ցավի հաճախակի պատճառներից են աճման ցավերը։ Աճի պրոցեսում երեխաների մկաններն ու ոսկրերը կարող են աճել տարբեր տեմպերով, ինչը կարող է հանգեցնել դիսկոմֆորտի և ցավի։
- Վնասվածքներ – Ընկնելը, սպորտի հետ լկապված վնասվածքները կամ վթարները կարող են հանգեցնել ծնկի այնպիսի վնասվածքների, ինչպիսիք են փափուկ հյուսվածքների ձգվածությունը, լարվածությունը և անգամ ոսկրերի կոտրվածքները։ Այս վնասվածքները կարող են հանգեցնել ուժգին ցավերի և պետք է անպայման դիմել բժշկի։
- Գերծանրաբեռվածություն և շարունակաբար կրկնվող սթրես – Երեխաները, ովքեր մասնակցում են սպորտային խմբակների, կարող են ունենալ ծնկան հոդի վնասվածքներ՝ հոդի գերծանրաբեռնվածության և կրկնվող սթրեսի պատճառով։ Սա կարող է հանգեցնել ծնկոսկրաֆեմորալ համախտանիշի կամ Օսգուդ-Շլատերի հիվանդության (Osgood-Schlatter disease)։
- Ինֆեկցիա և բորբոքում – Որոշ դեպքերում ծնկի ցավը երեխաների մոտ կարող է հոդի ինֆեկցիայի և բորբոքման արդյունք լինել։ Մանկական իդիոպաթիկ արթրիտը կարող է ծնկան քրոնիկ ցավի պատճառ դառնալ։
- Ծնկների «ծռություն» – genu valgum և genu varum խանգարումները կարող են ծնկան հոդերի լրացուցիչ ծանրաբեռնվածության, դիսկոմֆորտի և ցավի պատճառ լինել։
Ծնկան ցավին ուղեկցող ախտանիշները երեխաների դեպքում
- Ցավ և դիսկոմֆորտ – Երեխաները կարող են գանգատվել ծնկի ցավից, հատկապես ֆիզիկական ակտիվությունից հետո և գիշերային ժամերին
- Այտուցվածություն և կարմրություն – Սա կարող է վկայել վնասվածքի և բորբոքման մասին
- Քայլվածքի խաթարում – ծնկի ցավի հետևանքով երեխաները կարող են փոխել իրենց քայլվածը՝ դիսկոմֆորտը նվազեցնելու նպատակով
- Շարժման ամպլիտուդի սահմանափակում – Ծնկան հոդը լրիվ ծալելու կամ տարածելու դժվարություն կամ անհնարինություն
- Հպվելիս ծնկան տաքության զգացողություն – Սա վկայում է բորբոքման մասին
Ի՞նչ պետք է անեն ծնողները
Եթե երեխան գանգատվում է ծնկի ցավից, ապա ծնողները պետք է անեն ստորև նշված քայլերը․
- Լսեք ձեր երեխային – ուշադրություն դարձրեք ձեր երեխաների գանգատներին և բողոքներին։ Նրանց հաճախ աննշան թվացող գանգատները կարող են կարևոր նշանակություն ունենալ առկա խնդրի մասին հուշելու գործում
- Հանգիստ և սառույց – Եթե ցավը վնասվածքի հետևանքով է, ապա խնդրեք երեխային հանգիստ նստել և սառույց դրեք ցավող և այտուցված հատվածի վրա։
- Դիմեք մանկաբույժի – Եթե ցավը շարունակական է և/կամ ուժեղ, խորհրդակցեք մանկաբույժի կամ մանկական օրթոպեդ-վնասվածքաբանի հետ՝ ճշգրիտ ախտորոշման նպատակով։ Նրանք կարող են նշանակել համապատասխան հետազոտոթյուններ՝ ռետգեն հետազոտություն, մագնիսառեզոնանսային շերտագրություն (ՄՌՏ) ցավի պատճառը հասկանալու համար։
- Ֆիզիոթերապիա – Հոդերի «ծռության» դեպքում ֆիզիոթերապիան կարող է օգտակար լինել ծնկան շուրջ մկանների ձգման և հոդի կայունության ավելացման հարցում։
- Դեղորայք – Կախված պատճառից, ձեր երեխայի բժիշկը կարող է նշանակել ցավազրկողներ և հակաբորբոքային դեղորայք՝ դիսկոմֆորտի նվազեցման նպատակով։
- Աջակցող սարքեր – Որոշ դեպքերում բժշկի կողմից կարող են նշանակվել օրթոպեդիկ սարքեր և հատուկ կոշիկներ, որոնք նվազեցնում են ծնկան հոդի լարվածությունը։
- Կենսակերպի փոփոխություններ – Ծնողները պետք է համագործակցեն բժիշկների հետ՝ երեխայի կենսակերպում անհրաժեշտ փոփոխություններ անելու համար, ինչը կկանխի վնասվածքների կրկնությունն ու բարդությունների առաջացումը։
- Երկարատև հսկողություն – Այնպիսի քրոնիկ վիճակների համար, ինչպիսիք են մանկական իդիոպաթիկ արթրիտը, անհրաժեշտ է շարունակական հսկողություն ու երկարատև բուժում՝ ծնկի ցավի բուժման և բարդությունների կանխարգելման նպատակով։
Ամփոփում
Ծնկի ցավը երեխաների շրջանում տարածված խնդիր է, բայց ճշգրիտ ախտորոշման և համապատասխան միջոցառումներ ձեռնարկելու դեպքում հնարավոր է օգնել երեխային խուսափել հետագա բարդություններից։ Անհագստացնող և տևական ցավի դեպքում դեպքում անհրաժեշտ է դիմել մանկական վնասվածքաբան-օրթոպեդի՝ ճշգրիտ ախտորոշման և բուժման նպատակով։