Արևահարություն
Այս հոդվածում կարող եք գտնել անհրաժեշտ տեղեկատվություն արևահարության, դրա կանխարգելման և բուժման մասին։
Արևահարությունը տարածված ախտաբանական վիճակ է, որն առաջանում է, երբ մաշկը ենթարկվում է արևի ուլտրամանուշակագույն (ՈւՄ) ճառագայթների ուժեղ ազդեցությանը։ Իհարկե դրսում ժամանակ անցկացնելն ու արևային լոգանք ընդունելը կարող է օգտակար լինել, սակայն պետք է մի շարք միջոցառումներ ձեռնարկել՝ արևահարությունը կանխելու համար, քանի որ այն կարող է հանգեցնել դիսկոմֆորտի, այրման զգացողության և մաշկի հետագա վնասման։
Ի՞նչ է արևահարությունը
Արևահարությունն առաջանում է, երբ մաշկի բջիջների ԴՆԹ-ն վնասվում է ՈՒՄ ճառագայթների ազդեցության հետևանքով։ Մարմինը պատասխանում է դրան՝ մեծացնելով դեպի մաշկ արյունամատակարարումը, ինչի հետևանքով ախտահարված հատվածում առաջանում է կարմրություն, ցավ և բորբոքում։ Արևահարության ռիսկը ավելի է մեծանում, եթե մաշկը ենթարկվում է արևի ՈՒՄ ճառագայթների ազդեցությանը առավոտյան ժամը 10-ից մինչև ցերեկը ժամը 4-ն ընկած սահմաններում։ Մաշկի բաց գույն ունեցող մարդիկ առավել խոցելի են արևի ՈՒՄ ճառագայթների հանդեպ և ունեն արևահարման առաջացման առավել բարձր ռիսկ։
Արևահարման ախտանիշները
Արևահարման ախտանիշները սովորաբար ի հայտ են գալիս արևի ճառագայթների ազդեցությունից մի քանի ժամ անց։ Այդ ախտանիշներից են․
- Կարմրություն – Մաշկը դառնում է կարմիր և տաք
- Ցավ և այտուցվածություն – Արևահարման ենթարկված մաշկի հատվածը ցավոտ է և գերզգայուն
- Այտուցվածություն – Բորբոքումը կարող է հանգեցնել հեղուկի կուտակման ախտահարված հատվածում և դրա այտուցվածությանը։
- Բշտեր – Ծանր արևահարման դեպքում մաշկի վրա կարող են գոյանալ բշտեր
- Թեփոտում – Մի քանի օր անց արևահարված հատվածում առաջանում է թեփոտում, որը վկայում է ապաքինման մասին։
Կանխարգելում
Արևահարման կանխարգելումն ավելի դյուրին է, քան դրա հետևանքների հետ առնչվելը։ Ահա կանխարգելման մի քանի եղանակ։
- Օգտագործեք արևապաշտպան քսուքներ– Անհրաժեշտ է մարմնի բաց հատվածները պատել արևապաշտպան կրեմով՝ նվազագույնը SPF-30, անգամ ամպամած օրերին։ Քսուքն անհրաժեշտ է կրկին քսել մաշկի բաց հատվածներին յուրաքանչյուր 2 ժամը մեկ կամ լողալուց կամ էլ ինտենսիվ քրտնելուց հետո։
- Պաշտապանիչ հանդերձանք – Հագեք երկարաթև հագուստ, երկար տաբատ, կրեք արևային ակնոցներ և լայնեզր գլխարկներ, որոնք կպաշտպանեն ձեր մաշկն ու աչքերը ՈՒՄ ճառագայթներից։
- Փորձեք մնալ ստվերում – Փորձեք գտնվել ստվերի ներքո՝ հատկապես օրվա ինտենսիվ ճառագայթման ժամերին։
Ի՞նչ անել արևահարման դեպքում․
Եթե ձեզ մոտ առաջացել է արևահարում, ապա կարող եք դիմել հետևյալ քայլերին՝ ցավն ու դիսկոմֆորտը նվազեցնելու համար․
- Սառը թրջոցներ – Ախտահարված հատվածին դրեք սառը թրջոցներ՝ ցավի և բորբոքման նվազեցման համար։
- Խմեք շատ հեղուկ – Խմեք մեծ քանակությամբ հեղուկ, քանի որ արևահարման հետևանքով օրգանիզմը կարող է ջրազրկվել։
- Օգտագործեք ցավազրկողներ – Իբուպրոֆենը կամ Ասպիրինը կարող են նվազեցնել ցավն ու բորբոքումը։
- Խոնավեցրեք մաշկը – Օգտագործեք նուրբ, ալկոհոլ չպարունակող խոնավեցնող միջոցներ՝ չոր և թեփոտված մաշկը խոնավեցնելու նպատակով։
- Խուսափեք արևի հետագա ազդեցությունից – Ժամանակ տվեք ձեր մաշկին լավանալու՝ խուսափելով արևի ճառագայթների հետագա ազդեցությունից։
Ե՞րբ դիմել բժշկի
Որոշ դեպքերում արևահարումը կարող է այնքան ծանր լինել, որ անհրաժեշտ լինի դիմել բժշկի։ Այդ դեպքերից են․
- Առաջացել են մեծ քանակությամբ բժշտեր և ցավը շատ է ուժգնացել
- Ունեք ջրազրկման այնպիսի ախտանիշներ, ինչպիսիք են գլխապտույտը, թուլությունը, հաճախասրտությունը։
- Արևահարությունն ուղեկցվում է մարմնի ջերմաստիճանի բարձրացմամբ, դողով և սրտխառնոցով։
- Արևահարված հատվածի վիճակը չի լավանում մի քանի օրվա ընթացքում
Այս ախտանիշների առկայության դեպքում կարող եք դիմել մաշկաբանի՝ հերթագրվելով նրա մոտ Doctor Yan հավելվածի միջոցով։
Ամփոփում
Արևահարությունը տարածված ախտաբանական վիճակ է, որը կարող է հանգեցնել դիսկոմֆորտի և ցավի զգացողության և մաշկի հետագա վնասման։ Այն կարող եք կանխարգելել արևապաշտպան քսուքների, համապատասխան հանդերձանքի և արևի ուղիղ ճառագայթներից խուսափելու միջոցով։ Եթե արևահարվել եք, կարևոր է ժամանակին ձեռնարկել ճիշտ միջոցառումներ՝ ապահովելով մաշկի հետագա առողջացումը։