Ոտքերի այտուցվածություն
Ոտքերի այտուցվածությունը մի վիճակ է, որն առաջանում է, երբ ոտքերում կուտակվում է ավելորդ հեղուկ, ինչն առաջացնում է այտուց, ծանրության և դիսկոմֆորտի զգացողություն։ Այն կարող է հանդիպել բոլոր տարիքի մարդկանց և պայմանավորված լինել մի շարք գործոններով։ Այս հոդվածում մենք կներկայացնենք ոտքերի այտուցվածության պատճառները, ախտանիշները և բուժման մեթոդները։
Ոտքերի այտուցվածության պատճառները․
- Երակային անբավարարություն։ Առաջանում է, երբ ոտքերի երակները ի վիճակի չեն լինում էֆեկտիվորեն վերադարձնել ոտքերում կուտակված արյունը դեպի սիրտ։
- Սրտային անբավարարություն։ Սրտային անբավարարությունը հանգեցնում է հեղուկի կուտակմանը թե՛ ոտքերում, թե՛ մարմնի այլ հատվածներում, քանի որ սիրտը չի կարողանում բավարար չափով շրջանառել արյունը։
- Երիկամային հիվանդություն։ Երիկամային հիվանդությունը կարող է հանգեցնել հեղուկի կուտակմանը մարմնում, այդ թվում՝ ոտքերում։
- Լիմֆէդեմա։ Լիմֆէդեման վիճակ է, երբ ավիշը բավարար չափով չի հեռացվում ոտքերից, ինչը հանգեցնում է դրա կուտակմանը ոտքերում և այտուցվածության առաջացմանը։
- Դեղորայք։ Որոշ դեղամիջոցներ, ինչպիսիք են զարկերակային ճնշումն իջեցնող որոշ դեղերը, հորմոնները և հակադեպրեսանտները կարող են հանգեցնել ոտքերի այտուցվածության, որպես կողմնակի էֆեկտ։
- Հղիություն։ Հղիության ընթացքում հորմոնալ փոփոխությունները կարող են հանգեցնել ոտքերի այտուցվածության։
Ոտքերի այտուցվածության հետ հանդիպող այլ ախտանիշներ․
- Մաշկն ունի ձգված և փայլուն տեսք
- Այտուցված հատվածների ցավ
- Քայլելիս կամ կանգնելիս առաջաոց դիսկոմֆորտ և/կամ ցավ
- Այտուցված հատվածներում տաքության զգացողություն կամ կարմրություն
- Տեսանելի լայնացած երակներ
- Ոտնաթաթերի և ծնկների շարժունության նվազում
- Մաշկի վրա վերքերի, խոցային մակերեսների առկայություն (ծանր դեպքերում)
Բուժումը․
Ոտքերի այտուցվածության բուժումը կախված է հիմքում գտնվող պատճառից։ Առավել տարածված բուժական մեթոդներից են․
- Սեղմող գուլպաներ կրելը։ Սեղմող գուլպաները օգնում են կանխել ոտքերի այտուցվածությունը՝ ճնշում գործադրելով ոտքերի վրա։ Հասանելի են նրանց տարբեր տեսակներ, որոնք տարբերվում են չափերով և ոտքերի վրա գործադրվող ճնշումով։ Դրանք կրել կարելի է միայն բժիշկ-անոթաբանի կամ անոթային վիրաբույժի նշանակմամբ։
- Միզամուղներ։ Միզամուղները նպաստում են օրգանիզմից ավելորդ հեղուկի դուրսմղմանը։ Դրանք հաճախ նշանակվում են երիկամային հիվանդության, սրտային անբավարարության և ավելորդ հեղուկի պահմամբ ուղեկցվող այլ հիվանդությունների դեպքում։
- Ոտքերի բարձր դիրք։ Ոտքերը բարձր դիրքում պահելը նպաստում է այնտեղ կուտակված հեղուկի հեռացմանը ոտքերից։
- Մարմնամարզություն։ Կանոնավոր մարմնամարզությունը լավացնում է ոտքերում արյան շրջանառությունը և նվազեցնում ոտքերի այտուցվածությունը։
- Քաշի նվազում։ Ավելորդ քաշի կորուստը նվազեցնում է ոտքերի վրա ընկնող լարվածությունը և լավացնում արյան շրջանառությունը։
- Վիրաբուժական միջամտություն։ Որոշ դեպքերում հնարավոր է վիրաբուժական միջամտության անհրաժեշտություն՝ հիմքում ընկած խնդրի լուծման նպատակով։
Ամփոփում․
Ոտքերի այտուցվածությունը կյանքի որակի վրա ազդող ախտանիշ է, որի հիմքում կարող են ընկած լինել լուրջ հիվանդություններ։ Շատ կարևոր է ոտքերի այտուցվածության դեպքում դիմել թերապևտի, սրտաբանի, երիկամաբանի և անոթային վիրաբույժի՝ հիմքում ընկած հիվանդության ախտորոշման ու ժամանակին ճիշտ բուժում ստանալու համար, խուսափելու համար հետագա ծանր բարդություններից, ինչպիսիք են ոտքերի վրա չփակվող խոցերը, մեռուկացման օջախները և այլն։